Femida

Məxfilik siyasəti

Son yenilənmə: 13 noyabr 2026

Qısaca

  • Məlumatlarınızı satmırıq və reklam üçün istifadə etmirik.
  • Tətbiqdə reklam və izləmə (tracking) alətləri yoxdur.
  • Məlumatlar şifrələnmiş bağlantı ilə ötürülür və qorunan serverlərdə saxlanılır.
  • Məlumatlarınızı yalnız Femida-nın işləməsi üçün lazım olan xidmət təminatçıları emal edir.
  • Hesabınızı istədiyiniz vaxt tətbiqin içindən silə bilərsiniz.

1. Biz kimik

Femida tətbiqini və femida veb saytını Robotize Ltd (Birləşmiş Krallıqda qeydiyyatdan keçmiş şirkət) idarə edir. Bu siyasətdə “biz” dedikdə Robotize Ltd nəzərdə tutulur. Şəxsi məlumatlarınızla bağlı suallar üçün: femida@rbtize.co.uk.

2. Hansı məlumatları toplayırıq

  • Hesab: adınız, e-poçt ünvanınız, Apple və ya Google ilə daxil olduqda həmin hesabın identifikatoru, qeydiyyat tarixi və razılığınızın vaxtı.
  • Söhbətlər: Femida-ya yazdığınız suallar, onun cavabları və hazırladığı sənədlər.
  • Fayllar: əlavə etdiyiniz PDF və şəkillər. Femida onları cavab üçün oxuyur və hesabınızda saxlayır ki, sonradan seçdiyiniz vəkilə göstərə biləsiniz. Onları yalnız siz və müraciətinizə əlavə etdiyiniz halda seçdiyiniz vəkil aça bilər.
  • Səs: səsli mesajlarınız yalnız mətnə çevrilir və saxlanılmır.
  • Telefon nömrəsi: vəkilə müraciət etdikdə.
  • Rəyiniz: “Rəy bildirin” ilə göndərdiyiniz qiymət və mətn. Komanda onu oxuyur və lazım olsa sizə e-poçtla cavab yazır.
  • Ödənişlər: aldığınız Bal paketi və əməliyyatın tarixi. Kart məlumatlarınızı görmürük: ödənişi Apple və ya Google qəbul edir.
  • Vəkillər üçün: profil məlumatları (ad, şəkil, ixtisas, şəhər, təcrübə), vəsiqə nömrəsi, telefon, vəkil vəsiqəsinin və şəxsiyyət vəsiqəsinin şəkli və selfi. Vəsiqə şəkilləri və selfi yalnız yoxlama üçündür və qərar veriləndən sonra silinir.
  • Texniki məlumatlar: bildiriş göndərmək üçün cihazın bildiriş açarı, xətaları aradan qaldırmaq üçün server qeydləri, hər cavabın xərcini hesablamaq üçün istifadə olunan söz (token) sayı.

FİN kodu toplamırıq. Femida sənəd hazırlayanda şəxsiyyət vəsiqəsi kimi məlumatların yerini boş saxlayır ki, onları çap etdikdən sonra əl ilə yazasınız.

3. Məlumatlardan nə üçün istifadə edirik

  • Suallarınıza Azərbaycan qanunları əsasında cavab vermək və sənəd hazırlamaq.
  • Hesabınızı, balansınızı və söhbətlərinizi saxlamaq ki, istənilən cihazdan davam edəsiniz.
  • Vəkillə əlaqə: vəkil müraciətinizi qəbul etdikdən sonra adınız və telefonunuz ona, onun adı və telefonu sizə göstərilir. Qəbul edilənə qədər vəkillər yalnız adsız xülasəni görür.
  • Rəylər: vəkil haqqında rəyiniz adınız və soyadınızın ilk hərfi ilə göstərilir (məsələn, “Aysel M.”). Məhkəmə işinin nömrəsi heç kimə göstərilmir.
  • Xidmətin təhlükəsizliyi, sui-istifadənin qarşısının alınması və xətaların düzəldilməsi.

Hüquqi əsas: xidməti göstərmək üçün müqavilə (istifadə şərtləri), qeydiyyat zamanı verdiyiniz razılıq və xidməti təhlükəsiz saxlamaqda qanuni marağımız.

4. Məlumatlar harada saxlanılır və kimlə bölüşülür

Hesab və söhbət məlumatlarınız Avropa İttifaqında, İrlandiyada yerləşən serverlərdə (Supabase) saxlanılır. Femida-nın işləməsi üçün aşağıdakı xidmət təminatçıları məlumatların bir hissəsini bizim adımızdan və müqavilə əsasında emal edir. Onların bəziləri ABŞ-da yerləşir.

  • Supabase: verilənlər bazası, giriş və fayl saxlama (Aİ, İrlandiya).
  • Vercel: veb server, sorğular onun serverlərindən keçir (ABŞ və Aİ).
  • Anthropic: suallarınıza cavab yazan süni intellekt (ABŞ). Göndərilən mətni və faylları öz modellərini öyrətmək üçün istifadə etmir.
  • Google (Gemini): qanunlarda axtarış və səsli mesajı mətnə çevirmək (ABŞ). Ödənişli xidmət şərtlərinə görə bu məlumatları öz məhsullarını təkmilləşdirmək üçün istifadə etmir.
  • Apple və Google: hesaba giriş və tətbiqdaxili ödənişlər.
  • RevenueCat: Bal alışlarının qeydi (ABŞ).
  • Expo: bildirişlərin cihazınıza çatdırılması (ABŞ).
  • “M-AGAMİRZA” MMC (VÖEN 1507677991): Azərbaycanda bizim adımızdan texniki işlər və texniki dəstək (Azərbaycan).
  • “JURNALİST FEMİDA” MMC (VÖEN 1506991121): Azərbaycanda bizim adımızdan vəkillərin qəbulu və sənədlərinin yoxlanılması, istifadəçilərə dəstək və inzibati işlər (Azərbaycan).

Məlumatlarınızı satmırıq, reklam şirkətləri ilə bölüşmürük. Qanunla tələb olunduqda (məsələn, məhkəmə qərarı ilə) məlumatı səlahiyyətli orqana verə bilərik.

5. Nə qədər saxlayırıq

  • Hesab, söhbətlər və balans: hesabınızı silənə qədər.
  • Əlavə etdiyiniz fayllar: söhbəti və ya hesabı silənə qədər. Vəkil müraciətinə əlavə etdiyiniz fayl həmin müraciətlə birlikdə qalır.
  • Vəkilin vəsiqə şəkilləri və selfi: yoxlama qərarı verilən kimi silinir.
  • Hesabı sildikdə söhbətləriniz, fayllarınız, profiliniz, müraciətləriniz, rəyləriniz və şəkilləriniz silinir. Xərc qeydləri adsız şəkildə qalır.
  • Server qeydləri: qısa müddət, xətaları aradan qaldırmaq üçün.

6. Necə qoruyuruq

  • Bütün bağlantılar şifrələnir (HTTPS).
  • Verilənlər bazası saxlanarkən şifrələnir və hər istifadəçi yalnız öz məlumatlarını görə bilir.
  • Komandamızdan yalnız lazım olan şəxslər, yalnız lazım olduqda məlumatlara baxa bilər.

7. Hüquqlarınız

İstənilən vaxt:

  • Haqqınızda hansı məlumatların saxlandığını soruşa və surətini ala bilərsiniz.
  • Səhv məlumatın düzəldilməsini istəyə bilərsiniz.
  • Hesabınızı silə bilərsiniz: Kabinet → Hesabı sil. Və ya bizə yazın.
  • Razılığınızı geri götürə bilərsiniz: bunun üçün hesabı silmək kifayətdir.
  • Şikayət edə bilərsiniz: bizə, Birləşmiş Krallığın məlumat mühafizəsi orqanına (ICO) və ya Azərbaycanda səlahiyyətli orqana.

Sorğular üçün femida@rbtize.co.uk ünvanına yazın. 30 gün ərzində cavab veririk.

8. Uşaqlar

Femida 16 yaşından yuxarı şəxslər üçün nəzərdə tutulub. 18 yaşı tamam olmayan istifadəçilər Bal-ı valideyn və ya qanuni nümayəndənin razılığı ilə almalıdır. 16 yaşından kiçik şəxsin məlumatlarının bizə verildiyini bilsəniz, yuxarıdakı ünvana yazın: həmin hesabı siləcəyik.

9. Dəyişikliklər

Bu siyasəti dəyişsək, yeni versiyanı burada dərc edəcəyik. Əhəmiyyətli dəyişikliklər barədə tətbiqdə xəbər verəcəyik.

Femida hüquqi məlumat verir və sənəd hazırlamağa kömək edir. O, vəkil deyil və vəkilin məsləhətini əvəz etmir.